الشارع ما هو الا حمام مفتوح

شوف عمايل الشعب..عيب والله عيب

الحلقة الاولى

كل يوم بننزل فيه الشارع بنشوف سلوكيات اما بنضحك عليها او اننا بنتحرج منها خاصة لو معانا زوار من برة بيتحول وشك في لحظة لطماطم وكانك انت اللي عملت السلوك دا .. السلوكيات دى لا بيحوأ معاها قوانين و لا تنبيه
لو سمحت ماتكملش وتقول "كأنهم قاعدين في غابة .. و كأنهم الناس اللي في البدائية" للاسف في الغابة مش بيحصل كدة ولا ايام البدائية كان بيحصل كدة .. والجملة اللي بتتقال هى جت علينا .. اه جت عليك ممكن لو حد شافك بتعمل حاجات صح حيتكسف ويقلدك..زوايا مختلفة نزلت ورصدت ..اليكم الشارع المصري

الشارع ما هو الا حمام مفتوح .. تبص تلاقي واحد مديلك ظهره في جنب اي عمارة او جنينة ولما تسال ايه الراجل الغريب دا تلاقيه عفوا .. يتبول... لو كانت بنت اللي شافت تبقى في نص هدومها لو كان معاها حد او لوحدها ولو كان ولد معاه بنت الاتنين يبقوا اشبه بسبت الطماطم ، لو جيت اتكلمت عن الظاهرة حتقول خلاص مااتعودنا بس اللي انتوا مش عارفينه ان دا بيعكس صورة مجتمع ، ولو دققت في الظاهرة حتلاقي ان غياب الاخلاقيات وجملة " هى جت عليا " هما السبب الحقيقي وللاسف الظاهرة دى بتعلم جيل لسة طالع للنور معنى اللااخلاقي وفكك ما الكل بيعمل كدة ، طيب حتقولوا فين الحمامات العامة اللي موجودة حرد رد بسيط حنقولكوا في وموجودة في كل حتة لكنها غير صالحة للاستخدام الادمى اللي الكلب يقرف يدخلها ناهيك عن الرائحة فلا تعليق ..
ولو قررت انك تغامر وتيجي على انفك قصدى نفسك وتدخل الحمام العمومى في وقت متاخر بليل عفوا فالحمام العام مغلق !!!
تعالوا نشوفها صحيا ايه اضرارها :
بلهاريسيا عن طريق المصاب حيث يتبول في الحديقة العامة اللي حيكون اول عامل للحديقة هو اول ضحايا ذلك السلوك ،ناهيك عن الرائحة التى تنتج عن التبول المستمر في المكان الغير مخصص له
لو زنقة معاك ممكن تدخل أي كافيه تطلب منهم دخولك للحمام وصدقنى مش حيطردوك بس حيبقى احسنلك واحسن للمجتمع ولمنظرك وانظفلك على الاقل حتلاقي مية ومناديل وناس مش بتتفرج عليك ..